Jagading Lelembut
Ngisor Wit Gedhe
Srengenge wis
katon angslup nyemburat warna kuning ning awang awang. Nuduhake yen wis wayah
surup. Aku karo Priyo mlaku arep bali menyang omah, bar nggolek pring ning kebon
cedak kuburan kae. Aku lagi kelingan yen saiki jebule malem jumat kliwon.
Sansaya dak cepetake anggonku mlaku bali menyang omah.
Priyo bingung
weruh lakuku sik gage-gage kaya kaya arep dioyak setan. Banjur dheweke dak
ceritani yen ngendhikane ibuku ning ngisor wit gedhe kae ana penunggune. Priyo
malah ngguyu kepingkel pingkel krungu critaku. Dheweke ora percaya babarblas
babagan kaya ngono kui. Banjur tak sauri yen durung tau diweruhi pancene ora
bakal percaya. Priyo malah sansaya ndadi anggone ngguyu krungu omonganku.
Tekane ngisor
wit, guluku krasa panas lan sikile Priyo krasa lara. Dheweke malah ngajak aku
lungguh, leren ning ngisor wit gedhe iki sedhela. Lagi wae arep ndelehke
bokong, ujug ujug ana mbah tuwa ngageti seka mburiku. Awakku ndredeg weruh mbah
mbah iki merga rambute dawa rewok rewok, untune ireng, klambine lusuh, tur kok
ya nggawa teken anggone mlaku. Banjur Priyo nakoni mbah tuwa kui mau. Jarene
awakdhewe ora oleh lungguh ning ngisor wit gedhe wayah surup ngene iki ndak
diweruhi penunggune kene. Aku sansaya keweden, awakku adem panas ora karuan.
Priyo gage-gage tak ajak mulih, nanging malah dheweke ngeyel tetep arep leren
mergane sikile isih krasa lara.
Ora let suwe
anggonku karo Priyo leren, angin sik maune mung krasa semilir dadi gedhe.
Hawane sansaya adhem, langite ya sansaya peteng. Dumadakan ana ambu tela godhog dibarengi wong ngadeg
gedhe dhuwur ning mburine wit. Tak delok saka soroting lampu sing adoh kae,
bayangan kui nduweni rambut rewok rewok.
Kukune sing nyekeli wit kui uga dawa-dawa. Matane abang tur gek mendelik
ngindhik indhik saka walike wit mau. Aku sik weruh ora bisa ngapa ngapa. Jan teka
meneng ngadeg kaya wong mati rasa. Arep mlayu sansaya abot sikile.
Priyo sik weruh
aku meneng wae banjur nekoni “Di, Sardi.. kowe ki ngopo kok malah meneg wae?”
dak jawab “A..anu yok A..nu aa..na..” “kowe ki ngomong kok ona anu ki kepiye. Mbok
sik jelas” kandhane priyo. Aku ora bisa mangsuli mung bisa nuduhke nggo drijiku
sik ndredeg. Priyo banjur ngetutke drijiku kui nuduhke apa. Dheweke yo weruh
gendruwo kui ning mburine wit lagi kaya wong ndelik. Tangane gendruwo ngawe
ngawe marang aku lan priyo, pratanda yen dheweke pengen ngajak. Dumadakan priyo
jerit ora karuan bantere. Aku sansaya wedi sak wedi wedine. Priyo nyekeli
tanganku kenceng banget rasane, banjur diajak mlayu sak banter bantere menyang
omah.
Komentar
Posting Komentar